الصولد .. قلّة الحيا .. تجـّـار الـعـُـمـْـره .. و حاجات اخرين

هستيريا الصولد .. هالكذبة الكبيرة .. و رغم اننا نعرفوه كذبة .. كيما الكذب متاع الدعاية .. أيّ دعاية .. لكن احنا .. الشعب الكريم .. نخرجولو .. و تاكل بعضها ...
حركية .. و شيخات .. و سعاده صولدويّه ما كيفهاش ..
لكن اشبيه الصولد متاعنا في اغلب الاحيان ما يجي كان في اللبسه ؟؟؟ياخي احنا لهالدرجه عرايا .. مجرتلين ..نرعشو من البرد و من الحفا .. و العرا .. و القرا ..؟؟؟
شبيه ما يجيش في المواد المدرسية.. مثلا .. كي تشري ممحاة .. "قوووم" بالعربي ..:).. عندك خمسة كرارس سبيسيال بلاش .. خلّي القلـّــيل يفرّح صغيّراتو .. و الا في المواد الغذائية .. على حكّة هريسة .. عندك كيلو علّوش بلوشي .. خاصة مع الكارثة متاع السنا .. بالطبيعة نحكي على الجهات اللي تعاني من الجفاف .. و اللي ولّى كيلو العلوش فيها بـ : سبعة لاف .. بعد عشره لاف..و هي راهي حاجة ما تفرّحش .. خاطر .. غير هزّ عليّ بركه اما خير والا يموت لي بالجوع ..
والا صولد في النقل .. عندكم كل يوم ساعتين تنقل بلاش .. خلّي تاكل بعضها بالازدحام .. ميسالش .. مع لذة البلـّـوشي .. يهون الازدحام .. و تهون روايح الضبابط على راي خونا بيغ ...ههههههههه
ايييه ..عاد .. و شويّة صولد متاع حرّيّات ..عندكم ثلاثه ايام .. اكتبو و قولو فيهم اش تحبّو .. من غير خطوط حملراء .. او زرقاء .. او قزوردي ..
لا محالة.. باش الواحد ما يكونش جحود ..هو راهو وقع صولد في الاتجاه هاذا .. في سن الانتخاب .. و وقع انخفاض من 20 سنه الى 18 ن سنه ..و ماذابينا نطوّرو هالصولد متاع الارقام .. نخفّضو حتى في هاك ال 99.99 في الميا .. و نهبّطوها شوي .. 80 ... 70 ...
و باللاهي مادامنا في موضوع الصولد و علاقتو بقلّة الحيا ..ثمّة جميّعة يخدمو مع وكالات الاسفار .. يبزنسولهم بلايص مقابل انهم يسافرو بلاش .. معقول و ربي يعينهم .. خاصة كي تبدا الحكاية سفريات متاع جو .. اما كي تاخذ الحكاية غطاء ديني ..من نوع يلزمني نستدرج 20 شايب و عزوزه .. نأثّر عليهم باش يعملو عـُـمـْـره ..و هوما في نظرو ماهم الا ارقام ..و يبدالك مرشد ديني .. عامل الجـّـالْ .. و يحكي بمنطق حشيتو في 20 بلاصة .. ..دزّيت فازتي في 4 عمرات ..و يبدا يحسب في اش باش يجيب .. صيف عاد .. موسم اعراس .. ذهوبات .. كساوي ... قماشات ... تولّي تعيّف و لازمها المطالبه بصولد متاع قلة حيا ..و هالسيناريو وقع مع الوالدة .. اللي هيّ حاجة ..اما دار بيها وحيّد معرفه من النوع اللي كنت نحكيلكم عليه .. و اقنعها اللي الحجّه ما هيش كافية .. و يلزمها تعمل:
Rappel
نقصد عمرة ..
و انا السيد نعرفو مليح .. من هاك النوع اللي يحبّو ليلة سبعه و عشرين يقعدو في الصفّه لولانية .. اللي فيها الوالي ..و المعتمد .. على كعيبه بقلاوة .. وتبدا كلاصتهم فايحة
و كي جيت للحاجة .. اللي عندها اللهم ما عافينا .. ضغط دمّ .. و سكّر .. و كبيرة في العمر .. حبيت نقنعها بانها صحتها ما تسمحلهاش بعمره اخرى .. و مصروف زايد .. وراهي تنجم تتصدّق بيهم على 3 و الا 4 عايلات محتاجين .. قالتلي يزي بلا كفر .. باش تعرف خير من سي فلان ؟؟؟
على متاع الكلاصط...هههههههههه
ملا زبّاله ......

ثورة المعيز

صحيح انها الشعوب كي تجوع تنتفض .. مهما كانت هالشعوب .. مسلمة والا كافرة .. ملحدة والا مؤمنه .. قومية والا اقليمية .. مع الجوع و مع القوت اليومي .. هالرويق متاع الافكار ما عندوش فايدة .. و قت اللي يولي اللعب بالحياة .. يولي حساب اخر وقتها .. حساب بعيد برشة على برشه شبعانييييييين

باش شبعانين؟؟؟؟

بمتاع شكون ؟؟؟

الله اعلم

موش هاذا موضوعي الاساسي اللي حبيت نحكي فيه ..

هو موضوع يخصّ و يمس الجوع صحيح.. اما موش جوع البشر ..و انما جوع الهوش .. الحيوانات.. و ناكّدلكم حاجة انها الحكاية ما عندهاش حتى علاقه ببريجيت باردو .. ههههههه .. و انما عندها علاقه بتخيلاتي انهم الحيوانات اللي قاعدين يموتو بالجوع .. في العديد من المناطق الفلاحية الداخلية النائية ..البارده .. الشايحة .. هاك اللي يسمّوها تلطيفا من الكارثة "مناطق الظل"...و اللي تتاح لي الفرصة في العديد من الاحيان اني نتوجد فيها و نشوف بعيني النعاج و المعيز .. كبار و الا مولودين جدد .. و هوما يحتضرو .. و يقطعو في الروح .. من البرد.. و الجوع اللي ينقّص من قدرتهم على مقاومة البرد .. جفاف..لاحشيش ..لا ما .. لا علفه ..العلفة اللي سومها زاد بالاضعاف .. ..الفلاح باش باش يوكّل حيواناتو ؟؟ ..و اذا باع بالخسارة .. ينجم يتضرب بجلطة .. و الا بأي نوع اخر متاع حمايص .. انا شفت الحيوانات يحتضرو .. و يموتو و لسان حالهم يقول .. كي سيادتكم مازلتو متخلفين ..و داخلينها بعلي .. و رعواني و معمّلين على قطيرة الما اللي تجيكم من السما .. هاذا اذا حنّ عليكم المولى..علاش تربيو فينا .. و تستثمرو فينا .. و انتم ما كمش قــدّها ...راهو موش كان انتوما تنتفضوعلى رؤساكم كي تجوعو..حتى نحنا نجوعو و ننقمو عليكم و كان جات عندنا القدرة ... نعملو المظاهرات..على خاطر زيادة الاسعار نورمالمون في عام كيف السنا .. ما يلزمهاش تمسّ العلفة .. زيدو في البيره .. في القوشو .. في الشوكولين ..في الكارتي :) اما ما تزيدوش في العلفة ..

يا طوّرو فلاحتكم .. يا فكّو على سمانا

:)...الفين و تسعه ... شكون انـّـوميني ؟؟؟

من هنا لعام الفين و تسعه

.. تزيد تطّور اساليب الاتصال .. و معاها ..الانتخاب

.. و يمكن حتى اللي عمارهم ثلطاش .. و اربعطاش .. يولي عندهم الحق في الانتخاب..
و يولي كل شي يتعمل بالموزع الصوتي
و تولّي عاد .. :) تسمع كان ..
اشكون انـّــوميني ؟؟؟
فلان الفولاني انـّــوميني ؟؟؟
يا

..

خساره

سعّا هو يقتل...يقتل...يقتل
:)

fayrouz ... fi shi aam biysir

boomp3.com

تحريف :)

ناس قبل قالوا :

لا يعجبك نوار دفلى

في الواد عامل ظلايل

و لا يعجبك زين طفلة

حتى تشوف الفعايل

و انا نقول

لا يعجبك نوار دفلى

في الواد عامل زربية

و لا يعجبك زين طفلة

حتى تشوف الشهريّة

:):):)

promo-sport .. promo-mort ...

من المخجل انها اعداد القتلى و الشهداء في فلسطين و العراق و غيرها من المناطق المحتلة و الساخنة .. تحولت الى مجرد ارقام .. نتعاملو معاها بكل برود .. و بكل لامبالاة .. و اصبح ما ثماش فرق مابين ايّ رقم و رقم .. سواء رقم درجة حرارة في عاصمة من العواصم .. و إلا سكور متاع ماتش كورة .. و إلا عدد قتلى سقطو برصاص الاحتلال مهما كان
بينما كيف يموت زعيم .. والا ولد زعيم .. و الا خو مرة زعيم .. و الا حتى ولد خالة مولى الباش متاع دار الزعيم .. تقوم الدنيا و تقعد .. رغم انو الرقم هنا هو : واحد. القنوات تدخل في الحداد و تنحي الكليبات .. وتنحّي العرا .. العلامات تتنكـّس..المذيعات يلبسو لكحل و ينقـّصو الماكياج .. ..و اكثر من هذا .. تولـّي ذكرى .. يـأرّخو بيها
لها الدرجة ؟؟؟ ميات قتيل في البصرة ...؟؟؟ ميا و خمسين في غزة .. ؟؟؟ ميتين في النجف ....؟؟؟ ...عبارة على مجرد خبر اعلامي عادي .. يتعدى في هاك الشريط الاحمر اسفل الشاشة ؟؟؟؟؟
و بما انو كثر الهم يضحك ..نقترح اننا نعملو حاجة هكه .. كيما .. نشرة جويّة ..اما نسمّيوها نشرة القتلى .. نتكهّنو فيها اعداد القتلى اللي يمكن يسقطو في الايام القادمة .. مع تكهـّـنـّا بدرجات الحرارة
والا .. تعرفوش كيفاش ..
احنا مادام ولينا ما نجّموش نعملو حتى برنامج من غير مسابقات و اس .ام . اس ، نعملو حويجة كيف هكه ...و نسمّيوها برومو مور
Promo-mort
على وزن
Promo-sport
.....
عالم زبالــــــه .....

البترول بترولك .. والهـَـوى .. هـَـوايـَـا

يحكيو على الطاقة في بلادنا

.. بيبليسيتي

.. اشهارات

.. قدّم ساعة

.. وخّر ساعة

.. بترول طلع

.. بترول هبط

.. اوووووه .. حاصيلو .. عقّدونا ..
هالنهارات

.. نتفرج في برنامج على الطاقة في بريطانيا

.. قالّك اللي 15 بالميا من الطاقة عندهم مستخرجة من هاك المولدات متاع المراوح الهوائية

.. وهالخمسطاش بالميا تساوي الطاقه اللي يستهلكها المغرب العربي الكل تقريبا ..
عمّك البوهالي .. تساءل : تهاي الريح و العجاج و الهوا و السفّاي و الشهيلي ظهرو نعمة و ماهمش نقمة

.. و نحنا .. تباركلّة بلادنا متاع شهيليات و ارياح و عجاجاتِ

..و احنا متخلفين متخلفين

.. علاش مالة ما نطوروش هالطاقة الهوائية ..و الشمسية .. و نرجعو للبعلي في كل شي

..وفك علينا من الدول اللي تستعمر فينا بشوية البترول

.. و نحنا كيف حيّ نقّز

.. زيد البترول من غادي .. قدّم ساعة من هنا

.. و اتخمدو يا مواطنين على بكري ...قال شنوه : اقتصاد
و بالطريقة هاذي لا من ينجم يضغط على خوه باستعمال قوة امتلاك الطاقة

..ما دام الريح و الهَوا موجودين

.. يعني ..

كيما قال عبد الحليم حافظ : الهـَوى هـَـوايـَا