السبيطار في اخر البلاد . و لجنة التنسيق في قلب البلاد ..

عسلامتكم
سامحوني على الغياب .. بالطبيعة نحكي على اللي يحبوني و يلاحظو غيابي .. اما اللي يكرهوني ..نقوللهم مبروك على انكم رتحتو مني مدة .. و تعازيّ ليكم .. خاطر هاني رجعتلكم
ههههه
باختصار .. و اللطف عليكم ..جيت نتفافى على السيلاندر متاع الشـّـوفـّـو.. سخّان الما .. و السيبّورات متاعو مرخوفين ..طاح عليّ .. و حلّي ستّه غرز في كفّي .. و ما نعرفش كيفاش قلبلي منظر ايدي .. ولات كيما الخـُـفّ .. ههه ...و خسارة الفوتوغراف الخاص متاعي وقتها في كونجي .. لتالي ما نحرمكمش من هالمنظر .. بحياة راس السيد اللي كاريلي الدار ..و اللي زعمه رزاني في عمري .....عمري اللي كيما حكيت عليه في تدويناتي لولى .. عمر مزيان و معبّي بالسعادة .. و هاوينو بالاماره ثمه واحد انونيم قالّي مرّه : ربّي يفرّج ...عاد من نهارتها وانا حزين من تعليقو

ايّه سيدي دخت من الوجايع .. اما تشمّتت في روحي خاطر انا نتفافى على حاجة ما نعرفهاش .. في بالي نفضّل في حقّ التصليح..تبربّي هالعشرين و الا ثلاثين دينار اللي باش ياخذهم الصلاح .. موش يكيّفوني على الاقل عشرين يوم؟؟؟ ..
اما زايد مع حسابات ربي .. والله زايد .. كي يبدا مبرمجلك تنسيلة و ترييشة .. ينسّلك .. و يريـّـشك .. و الفلوس اللي كانت ماشية للصلاح .. مشات.. و بالدوبل متاع الدوبل تاكسيات للسبيطار..و دوايات
محلاه القضاء و القدر ... و مزينو ...
عااااد
من حرارة الروح خرجت حفيان(اما مانيش عريان كامّام هههه) ..و انا واقف نستنى في تاكسي .. للسبيطار .. تلفت على يميني و على يساري .. لقيت برشة مؤسسات قريبة مني .. و ماكنتش فايق بيهم .. مثلا ليلتها اكتشفت اللي لجنة التنسيق قريبة من داري .. و مركز الشرطة .. و الكارتي ....يعني الحاجات اللي ما حاجتيش بيهم الكل .. لقيتهم بحذايا ليلتها ..
الا عمّك السبيطار
و تساءلت .. مثلا و كان جات معايا المرا عندها الوجايع .. نهزّها للجنة التنسيق تولد على انغام الخطب المسجلة .. و الصغير يقمّطوه باللافتات .. و يرضّعوه من الميكروفونات .. ؟؟ و الا كيفاش ؟؟؟ـ