اولا .. و باش حتى واحد ما تسوّلّو نفسو الامّارة بالتكفير انّو يقيم عليّ الحدّ .. انا راني مسلم .. و نقول لا اله الا الله .. محمد رسول الله .. خاصة وقت الغصره .. كيما الشعب الكريم الكل
:)))
لكن حبيت ندلي بملاحظه لبعض الوخيّان اللي ناويين على ربي في حملة تدوينية دفاعا عن الاسلام ..و بربي .. قبل ما ننسى .. ياخي علاش ماهيش دفاعا على الاديان السماوية الكل .. ؟؟؟ ياخي موش احنا نمّنو بيهم الكل .. و اي "اساءه"لاي دين سماوي تمسّـنا؟؟؟
و الله تساؤلي بريء راهو..
نرجع لحيثيات هالحمله
واحد منهم .. الناس تناقش في المسايل التقنية و اختيار اللوقوات و الالوان و غيرها .. و هوّ .. هكاكه .. لا طاح لا دزّوه .. قام قال جملة ما عندها حاااااااتى دخل في السياق ..
قال .. الجماعة اللي يعتبرو في هشام شهيد .. كان دافعو على دينهم .. خيرلهم...ياخي الشهادة منين جايّه ؟؟ ماهي جايّة من الاسلام
ندعوك انك تتفرج في الفيديوهاذا فقط باش تتاكد انو السيد اللي مات مقتول هو ولد بلادك .. يعني كان ينجم يكون خويا و الا خوك .. و باش زادا تتاكد اللي والدتو المسكينة ماهيش روزا لكسمبورغ و الا مارلين مونرو والا غولدا مائير .. باش تخسر عليه : ربي يرحمو كانو من المسلمين
!!!!
الله غالب خويا العزيز .. خوك راني شعبي .. و نقول كلامي بالواضح و بالفلاقي و على هاذاكه نحب نقلّك ملاحظتين
اولا
ياخي موش كنت تنجم تساهم في هالحملة اللي عاملينها اصحابك .. و اللي انا شخصيا نحترمها .. من غير ما تجبد "جماعة" اخرين ؟؟؟
ثانيا
ياخي ما تظهرلكش روحك منغلق شويّة كي تقول: لا شهادة الا من الاسلام ؟؟؟ـ
ياخي الشعوب والامم الاخرى .. سواء قبل الاسلام و الا بعدو .. ما عندهمشي شهداء ..بمعنى ناس ماتوا حتّى هوما من اجل قضايا و من اجل مبادئ و...و...
؟؟؟؟
و الا الآخر منفي عندك ؟؟؟؟ـ
انت او لا احد ؟؟؟؟؟ ههههههه
*******
ملاحظة : التدوينه هاذي كان المفروض تكون ردّ على مولى التعليق لولاني في التدوينه هاذي .. وكي ريتها طوالت .. قلت برّا .. نردّوها تدوينه .. تعميما .. للاسئلة
و السلام عليكم و رحمة الله تعالى و بركاتو
11 commentaires:
السلام خويا البوهالي
ونشا الله تكون في حال طيب
باهي بنسبة لقفصة انا راني حكيت فيها وعملت بوست و تحل نقاش جدي مع بعض المدونين
هذا اولا
ثانيا خويا وراني نحبك و نعزك وبغض النظر عن انتمائك سواء كان اسلامي او غيرو
تنجم تشوف هدف الحملة تو تعرف علاش الدين الاسلامي بالذات
ورانا خويا البوهالي طللبنا بنهار برك وكيما قال عمروش كل حاجة في بلاصتها
والمشاركة موش لازم تكون بوست تنجم تحط شعار الحملة
في المدونة لمدة يوم وتبستي من لصباح على قفصة
وندعوك تراجع العنوان متع التدوينة متاعك
هيا صديقي ربي معاك وانتي زادة مدعو باش تشارك
اهلا تيتوف .. ربي يعزّك ..
تدوينتي ماهيش موجهة لتدوينتك .
.. بالعكس . كل حد حرّ .. اما التعليق لولاني عليها هو اللي توجّهتلو بالنقد هاذاكه.. ياخي اش دخّل قفصة و الجماعة في حملتكم . ؟؟؟ كان ينجّم يتفادا الملاحظه المجانية هاذيكا قفصة راهي متاع التوانسه الكل .. .. و نقدي ليه كان بعيد على السبّان حسب اعتقادي ما عدا بعض المزاح الخفيف
خبر عاجل: تعيش الرديف منذ يوم أمس أحداثا مأساوية اثر استفزازات قمت بها قوات الأمن لمتساكني الرديف و اندلعت مواجهات مفتوحة مع الأهالي فجرا وحسب الأخبار الواردة من هناك فأن المواجهات التي عرفتها البلدة كانت صباح اليوم اثر حملة الاعتقالات التي تمت ليلة البارحة و قد أفاق المواطنون صباحا على مشهد الدكاكين التي وقع اقتحامها و العبث بمحتواياتها و اتهم الأهالي قوات الأمن بالقيام بهذه الأعمال اذ رغم حفاظ الأهالي على الممتلكات العامة وعيا منهم بأنها ملك للجميع فأن بعض وحدات الأمن نظمت عمليات النهب لممتلكاتهم حسب رواياتهم و تواصل تدفق التعزيزات الأمنية بآليات جديدة لم يتعود المواطنون مشاهدتها حتى على شاشات التلفزة و قد هدّد اليوم تلاميذ الباكالوريا بمقاطعة الامتحانات الوطنية في صورة تواصل عمليات القمع و تقوم قوات الأمن حاليا بحملة تمشيط واسعة في الأحياء مما دفع أغلبية الشباب للهروب الى أطراف البلدة و لعل ما زاد في احتقان الأهالي بعد شيوع خبر تعرّي بعض رجال الأمن أمام النساء أثناء اقتحام البيوت السؤال المطروح لماذا تعمدت قوات الأمن تفجير الوضع بالرديف؟
هناك اشاعات تقول أن القوى الأمنية استنزفت و تريد الضغط على بعض رجال السياسة لحسم الوضع بالحوض المنجمي سواء بالحسم الأمني أو الحلول السياسية لكن هل يدفع سكان الرديف ضريبة التجاذب بين جنرالات الداخلية و جنرالات السلطة
romdhane
خويا لعزيز
تسالوك في محلو وحتى لو ماكانش برئ يقعد في بلاصتو لانو عندك الحق في الي تقول لكن نجاوبك بسؤال كيف يبداو عندك زوز ولا ثلاثة خوات بالطبع تحبهم كيفكيف وكيف يجي واحد يسب واحد فيهم ويتهمو بما ليس فيه،ماك باش تدافع عليه وماتسكتش موش هكه(سلميا بالطبع)يجيش منو خوه بجنبو ماجبدو حد تدخلو انت في المعمعة وتشوشر فيه علاش ؟
دونك احنافكرة في نطاق معين واطار محدد وضد ناس معينين شهدو هوما على رواحهم بانهم مسلمون سابقون،ريتني نكفر فلعباد ولاشاد عليهم سيف انا؟؟؟وزيد لطلبنا لااقامة حد وقطع ريوس قلنالهم خليونا في جهلنا وماتجبدوناش ونطلب منك بكل لطف برة اقر الساعة اش كتبت انا باش نوضح الهدف ومايصيرش سوء فهم.
نرجع حتى انا لسؤالك
تعرف خويالعزيز انو الفيديو هذيكه وصلتني اليوم على الصباح ومن وقتها وانا نغلي وفادد، قلي علاش؟
على خاطرني تعديت بحاجة اسمها موت وريت ام هشام رحمه وحسيت بنفس الشي الي تحس فيه ولكن الي زاد غاظني اكثر هو عدم احترام رهبة الموت والذات البشرية
الي غاظني هو تسيس القضية من اطرف معينة وهذاكه فكرة الاخ فرفر
لمرى تبكي وتشكي وهوما يحاولو باش ياخذو تصويرات معينة ويقلولهم لحديث هذاكه في مابعد
غاظتني كيف قعد ملوح وهوما يعريولو في وجهو
تغيضني كيف سركوزي يمشي بيدو يجب ولاد بلاد من قارة اخرى وحنى حتى كلمة في جريدة لا
خويا كلنا شعبيين وكلنا نحسو كيكيف لكن انا شخصيا ماعندي حتى انتماء معين وبن علي وازلامو مايعنيولي شي كيفهم كيف البيادق اللوح الي يسميو في رواحهم معارضة وزعمة زعمة يصورو ،انا الي غاظني اني رايت التسال ماتع ام هشام وتخيلتها تقول هاكم صورتو ومبعد كيف يطيح بيا الليل شكون بيا،هانا حطيناه في يوتوب وورينى اش جرى ومبعد؟؟؟فيبالك ليلتها المعتمد متعشاش ولا ماجاهش نوم؟ هشام راه يقعد حالة تنضاف لموتى ستار اكديمي وموت الكار متاع قربص هاك العام ووووووو مادام مفماش حساب ومحسابة للمسوؤلين باش نترزاو في الف كيف هشام
لا للتسيس ولا للتخوين وموش لازم نبدوا نتمنيوكو على بعضنا لاني اليوم بلحق متقلق كيف نشوف اش يجرى في بلادنا وانو الروح كي الذبانة
ا
اخطاني عيش خويا رانا لازم نتحدو مع بعضنا ونلقاو حل لبلادنا وفزاعة لخونجية كذبة كان جدت علينا عام تسعين راهم ماعادش ينجمو يعديوها علينا مرة اخرى موش لا يلدغ المومن من جحر مرتين ولا انا غالط
خويا
كل حاجة في بلاصتها هاني معاك نعملو الي تحب
تحبش نعملو صندوق ماهم مغرومين بالصنادق ونساهمو لعائلة هشام بحاجة
تحبش تعطيونا اسم المعتمد القاتل تو نعملو اشهار ماصارش(عندي شكون قريب يوصل لحكاية )
هات اعطيني افكار وصاحبك راجل
موش خير ولا نقعدو في ها واحد قال تشعبط فيحيط في هاو شهيد في هاو ماهوش شهيد
من نام لم تنتظره الحياة خويا خلينا واقعيين وفعالين وشوية جدية
وشكرا
اهلا عمروش
انا موافقك في برشة نقاط .. و نعرف انّو فلوس العالم و صناديق الدنيا ما يرجّعوش الابتسامه للام الثكلى
لكن اهوّه التعليق اللي بصراحة نرفزني
..و انا خلاقي عادمه من نفس الفيديو
ejjmai3a 3atine mai 3and_hom 3ala gafsa ..w9allek echahide hichem...ti brabbi hia la notion mta3 chahide jaya mel islam..9bal metdaife3 3ala echahide hichem....daife3 3ala dinek.. et apres etnajjem t9oule echahide hichem ..
J'aimerais juste clarifier une chose c'est qu'il est inutile de se prendre dans des action pour défendre la religion quand on n'est pas capable de défendre son propre droit à la vie décente. Vous croyez qu'avec une action : "Pour préserver notre prophète et notre religion" les gens vont arrêter de s'attaquer à l'Islam, c'est ça? ils ne sont même pas conscient que vous avez Internet chez vous déjà qu'ils savent que nos gouvernements censurent tout et que seuls certains accès nous sont permis. Par contre lorsque tu t'attaques au problème minier de Gafsa et que Mr "404Controler" passe vérifier ce qu'on a écrit là dessus, il saura que la colère est générale et vu qu'il habite au coin de la rue et qu'il sait qu'on peut l'atteindre en cas d'extrême colère, les choses pourront changer.
القهرة والظلم اغيب ما فما سي بوهالي
شخصيا عديت نهار غير طبيعي
وزيد كملو عليا جماعة المعارضة لاهمتهم فيه ولا في دارهم
اخر الاخبار تو تقلق انو فما شاب اسمو حفناوي بن رضا عمرو ثمانية عشرة سنة اصيب اصابة قاتلة برصاص حي...
ربي يقدر الخير
حقيقة خويا موش وقت خلافات نعاونو حتى باتحادنا
اززززززح وين ماشين بينا هاالكلاب
اوّلا أنا مع عمروش في الكلام اللي قالو الكل ماهواش وقت متاع انتوما واحنا هذا وقت متاع التوانسة الكل يكونو يد وحده وصوت واحد قدام الظلم اللي قاعد يتربص بينا الحكاية ماعادش فيها سكات واخطى راسي وأضرب توة الناس الكل مستهدفة والروح ولات كالذبانة بعد اللى قال "خلي يموتوا الحيوانات" لوقتاش السكات واستقاء المعلومة من ناس معينين اما معارضة والا اسلاميين اللى الاثنين نعتبرهم يخدمو في مصالح شخصيّة لو كان جات المعلومة تتقال للناس الكلّ في الاخبار الوطنية ونحكيو عليها الناس الكل ونحاولو نلقاو حلول جديّة ونبعدو من سياسة السكات وغطى عين الشمس بالغربال راهي البلاد بخير ورانا على الاقل ما نقعدوش تحت رحمة اعلام مشكوك في مقاصدو وانتماءاتو وتوجوهاتو وغاياتوا ما حاشتناش بناس تتاجر بالموت والمسائل الحياتية للشعب التونسي حاجتنا بناس تتحمل مسؤولية أخطائها وتتكلم وتسمع وتحاول الاصلاح الجدى متاع الاوضاع واذا كان تتصور انو العنف باش يجيب نتيجة فهو جد واهم لانو العنف ما يولد كان غضب وعنف أقوى وأعمق نتمنى انو الوسائل متاع الاعلام اخبار الثمنية والجرايد الكل تحكى وتفرّك الرمانه ويقولولنا شنوة قاعد يصير بعيد على سياسة الاباس والحمد الله ويزيونا من التعتيم الاعلامى رانا فدينا وروحنا طلعت
كي الواحد يشوف ها الشئ والناس آش صاير فيهم يكفر و يخرج من ملة سيدنا محمد الله يقدر الخير و برّه...
frere bouheli
ennna em3ak ya 5ouia
ensemble contre la censure
Enregistrer un commentaire