نحب نأكد على حاجة ..اني كيف نركز حديثي على اعاقتي ، مانيش نثير في الشفقة ... بالعكس..انا نتنرفز من اللي يحسسني بانو شافق علي..اما نحب نبين لروحي و للناس قدرتي على تجاوزها.. رغم انها ملازمتني في كل لحظة و كل ثانية من حياتي اليومية
ابسط شي .. كي نبدا راكب بجنب المدامة متاعي .. مسافرين.. و الا نقضو في قضيات .. و هي اللي تسوق بيّ في الكرهبة.. برشة فضوليين يسالوا : ياخي علاش انت ما تسوقش.. و نجاوبهم بكل بساطة لانو ناقص النظر برشة اللي كيفي ما يسمحولوش باش يعدي البرمي
قبل
كانت وضعية كيما هاذي تعذبني و اسألة كيما هاذي احيانا تبكيني..اما تو .. ما عادش نعدّل
وقت يقترحو علي جماعة و الا زملاء طريّح كارطة .. رامي .. ماتش كورة..وقت يسالني واحد على نومرو الكار..و الا الميترو..وقت اللي تجي ورقة الما و الا الضو و ما نعرفش قداش فيها ...وقت اللي ... و وقت اللي ... و وقت اللي ....
اما انا علمت روحي بروحي اني ما نستسلملهاش..و ما نتواكلش على الناس.. و مانكتفيش باني نكون موضوع تسخيف .. لا..نحاول نعيش عادي..عادي جدا .. و اي ملاحظة تجيني منّا والا منّا .. نعرفها ممكن تقلقني..ما نعدّلش عليها و فيسع ما نطرّدها من مخي ..
5 commentaires:
يا خونا البوهالي .. انامن الناس اللي ما نشوفش في اشارتك لاعاقتك بين ظفرين ..حتى اثارة للشفقة..و انا نشوف فيها فخر ليك ..لانك متجاوزها..و حتى كي تحكي عليها .. تحكي عليها من برّه بمي يوحي انك متحرر منها بشكل كبير...
اما نتصور عندك ما تحكي و ما تقول زادا في مجالات اخرى..في انتظار اضافاتك .. تقبل تحياتي..
أخ بوهالي
عسلامة
أنا راهو كي قتلك متكثرش في المدونة متاعك بالحديث علي الاعاقة متاعك ، نيتي هي النجاح للمدونة متاعك ، خاطر باش تحكي ديمة علي الموضوع هذا الناس ما عاتش تزورك و يقلقو من نفس الموضوع
ما نعرفش أنا ، مثلا طه حسين نتصورو حكا علي الاعاقة متاعو كان في الأيام و كتب علي برشة مواضيع أخرين.. و هذا سر النجاح متاعو
أي نهارك زين
بوهالي....كيما قال brastos إللّي يقرالك مايشوفش إعاقتك.
وبما أني، كيفك إنت، مانيش معاق....وأنا وإنت وبرش ناس أخرين نشوفو الأشياء بنفس العين...
نحبك ديما معانا باش نفضحو العمى إللي عند الأخرين...كل بطريقته.
وقد ما باش تكتب قد ما باش نقرالك.
وإذا اختلفت معك يوما فسوف أعلن لك اختلافي وسوف أنـتقدك بشدة لأنني لا أخشى عليك من إعاقتك.
أنا بشوق لقراءة المزيد...وبلا مجاملة!
وما تعدل على حتى حد.
اخ بوهالي
احنا معشر البشر مخلوقات ضعيفة وانانية وبحكم كثرة امراضنا النفسية واعاقاتنا الذهنية ديما تلقانا نلوجو على انسان ولا اي حاجة نفشو فيها عقدنا وخوفنا.
هذاكه علاش تلقاه المدير ياكل على رأسو في الدار من عند مرتو يجي الصباح يفش غيظو في الموظف المسكين باش يحس بروحو وبدوروا لموظف كيف يبدا في خدمة المواطن يفش فيه ضعفو والمواطن بحكم القهر والظلم و تحطم الأحلام تلقاه يلوج هو بيدو على منفذ للعقد ديالو و هكذ تتم دورة الحياة.
مثال بسيط للتوضيح.
في بلجيكيا فمة عنصرية شديدة: تلقاه البلجيكي يحقر العربي المولود في بلجيكيا ومايعطيشو فرصتو وهاك العربي يولي تحت الظغط يحقر العربي الي جاي مالبلاد و ينتقص منو وهذاكه الاخير يولي يحتقر لولاد بلادو الي عايشين في البلاد ويقلهم لابا شي نووو.
شقلالة و برة كيما تقول انت كلها سلعة زبالة.
فرفر
يزي من شريان الشبوك....صحة البورتابل .
براستوس
صحيح ما عنديش كان الناحية هاذيكة في حياتي .. اما يمكن هي اكثر حاجة مأثرة فيّ
فرفر
هاني باش نبدا ننوّع ماضيعي .. اما راني ديمة رهين مزاجي ههههه
jaccuze
اهلا بيك يا صديقي
9amrouch
كلامك صحيح .. كل واحد تتمارس علية سلطة ..يلوّج هو علي اضعفمنّو باش ينفس على روحو ...
Enregistrer un commentaire